ፀረ ሙስና ኮሚሽን የምድር ባቡር የድሬዳዋ ኃላፊዎችን በቁጥጥር ሥር አዋለ

የፌደራሉ ፀረ ሙስና ኮሚሽን የድሬዳዋ ቅርንጫፍ ጽሕፈት ቤት የቀድሞ የኢትዮ-ጂቡቲ ምድር ባቡር ኩባንያ የድሬዳዋ ተጠሪንና አራት ሌሎች የአመራር አባላትን፣ በሙስና ወንጀል በመጠርጠር በቁጥጥር ሥር አዋለ፡፡

ከድሬዳዋ በተገኘ መረጃ መሠረት ሰኔ 10 ቀን 2006 ዓ.ም. ጀምሮ በፖሊስ ቁጥጥር ሥር የዋሉት የቀድሞው ዋና ተጠሪ አቶ አየለ ወልደ ዮሐንስ፣ የሐዲድና የሕንፃ ኃላፊ አቶ ፋንታሁን ገበየሁ፣ የሳብ ተሳሳብ ኃላፊ የነበሩት አቶ ታደሰ ኃይለ ማርያም፣ የአኬሌ ወርክሾፕ ኃላፊ አቶ ፍቅረ ማርያም አበባየሁና የንግድና ትራንስፖርት ተጠሪ የነበሩት አቶ ደርብ ጉደታ መሆናቸው ታውቋል፡፡

አቶ አየለን ጨምሮ አምስቱም ተጠርጣሪዎች በድሬዳዋ ከተማ ከፍተኛ ፍርድ ቤት ሰኔ 12 ቀን 2006 ዓ.ም. ቀርበዋል፡፡ የኮሚሽኑ ዓቃቤ ሕግ ሥልጣንን ያላግባብ በመጠቀም፣ የመንግሥትን ይዞታ ለግለሰቦች በሕገወጥ መንገድ በማከራየትና የመንግሥት የግዢ ሥርዓት ሳይጠብቁ ግዢ በመፈጸም ክስ መመሥረቱን ለማወቅ ተችሏል፡፡

ባለፈው ሚያዝያ ወር በተመሳሳይ የድሬዳዋ ፖሊስና የፀረ ሙስና ኮሚሽን ፖሊስ በጋራ በመሆን የኢትዮ ጂቡቲ ምድር ባቡር ዋና ሥራ አስፈጻሚ የነበሩትን አቶ ጣዕመ ተኪኤን፣ ጉቦ በመቀበል ወንጀል በድሬዳዋ ከተማ ውስጥ ባረፉበት ሆቴል በቁጥጥር ሥራ ማዋላቸውን መዘገባችን ይታወሳል፡፡